ຂ່າວທົວໄປ

ບົດຖະແຫຼງຂ່າວ

Sponsor by sokxay plus

ວີທີຊື້ເລກ ໄດ້ຮັບເງີນຄືນ 5% ໄດ້ແທ້ 100%

ພຽງເທົ່ານີ້ ກໍ່ຮັບໄປເລີຍ ສ່ວນຫຼຸດ 5% ງ່າຍ



ບົດຖະແຫຼງຂ່າວ
ທ່ານ ນ. ທິບພະກອນ ຈັນທະວົງສາ, ຮອງລັດຖະມົນຕີ,ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ,

ຮອງຫົວໜ້າຄະນະສະເພາະກິດ, ຜູ້ປະຈຳການ, ຫົວໜ້າກອງເລຂາ.
ກ່ຽວກັບມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການລະບາດຂອງພະຍາດ ໂຄວິດ-19

ໄລຍະຕັ້ງແຕ່ວັນທີ 31 ມີນາ 2022 ເປັນຕົ້ນໄປ (ວັນພະຫັດ, ວັນທີ 31 ມີນາ 2022, ທີ່ກະຊວງສາທາລະນະສຸກ)

– ພໍ່ແມ່ ພີ່ນ້ອງຊາວລາວ ໃນທົ່ວປະເທດ ທີ່ນັບຖື ແລະ ຮັກແພງ.
ໂດຍໄດ້ຮັບມອບໝາຍ ຈາກທ່ານ ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ, ໃນນາມຫົວໜ້າກອງເລຂາ ຂ້າພະເຈົ້າ ຂໍແຈ້ງມາຍັງ ພໍ່ແມ່ພີ່ນ້ອງ ປະຊາຊົນລາວ, ພະນັກງານ, ລັດຖະກອນ, ທະຫານ, ຕໍາຫຼວດ,

ຜູ້ປະກອບການຊາວຕ່າງດ້າວ ແລະ ຊາວຕ່າງ ປະເທດ ທີ່ອາໄສ ຢູ່ ສປປ ລາວ ຊາບທົ່ວເຖິງກັນວ່າ: ປັດຈຸບັນ ການແຜ່ລະບາດຂອງພະຍາດໂຄວິດ-19 ຍັງສືບຕໍ່ມີການຕິດເຊື້ອເພີ່ມຂຶ້ນໃນແຕ່ລະວັນ ພ້ອມທັງ ແຜ່ລາມໃນຊຸມຊົນເປັນວົງກວ້າງ ຢູ່ເກືອບທຸກແຂວງ ເຊິ່ງສ່ວນໃຫຍ່ຕິດພັນກັບການເຄື່ອນໄຫວ ແລະ ການດຳລົງຊີວິດປະຈຳວັນ ຂອງບຸກຄົນ, ຂອງສັງຄົມ, ຄວາມບໍ່ເຂັ້ມງວດໃນການປະຕິບັດມາດຕະການປ້ອງກັນຂັ້ນພື້ນຖານ.

ອີກດ້ານໜຶ່ງ ໃນສອງອາທິດຂ້າງໜ້າ ບຸນກຸດສົງການປີໃໝ່ລາວກໍ່ຈະໝູນວຽນມາເຖິງ, ເຊິ່ງເປັນປະເພນີອັນດີງາມ ທີ່ປະຊາຊົນລາວ ໄດ້ສືບທອດມາຍາວນານ, ໂດຍປົກກະຕິແມ່ນມີການສະເຫຼີມສະຫຼອງອວຍພອນເຊິ່ງກັນ ແລະ ກັນ. ໃນເງື່ອນໄຂທີ່ມີການລະບາດ ຂອງພະຍາດລັດຖະບານ ໄດ້ຄົ້ນຄວ້າ ແລະ ຊີ້ນໍາ

ການສະຫຼອງປີໃຫມ່ລາວ ພສ 2565 ເຊິ່ງມີໃນແຈ້ງການຫ້ອງວ່າການສໍານັກງານນາຍົກລັດຖະມົນຕີ ເລກທີ 367, ເຊິ່ງໄດ້ມອບໃຫ້ຄະນະສະເພາະກິດ ກຳນົດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ 19.

ຄະນະສະເພາະກິດ ໄດ້ຄົ້ນຄວ້າ ແລະ ອອກແຈ້ງການ ສະບັບເລກທີ 370, ລົງວັນທີ 31 ມີນາ 2022, ຊຶ່ງໄດ້ກຳນົດມາດຕະການ ສໍາລັບໄລຍະຕັ້ງແຕ່ວັນທີ 31 ມີນາ 2022 ເປັນຕົ້ນໄປ. ລາຍລະອຽດຂອງແຈ້ງການ ມີດັ່ງນີ້:

ໃຫ້ຄະນະສະເພາະກິດກະຊວງ, ອົງການ, ບັນດາແຂວງ ແລະ ນະຄອນ ຫຼວງວຽງຈັນ ຊີ້ນຳໃນການກຳນົດຮູບແບບການສະເຫຼີມ ສະຫຼອງບຸນປີໃໝ່ລາວ ທີ່ອະນຸຍາດໃຫ້ສະເພາະກິດຈະກຳຕາມປະເພນີ ເຊັ່ນ: ການສັກກະລະບູຊາ, ສົງນໍ້າພະ ແລະ ບາສີສູ່ຂວັນພາຍໃນຄອບຄົວ ບົນຈິດໃຈປະຢັດມັດທະຍັດ, ບໍ່ຊຸມນຸມແອອັດ ເຮັດໃຫ້ເກີດມີການແຜ່ລະບາດເປັນວົງກວ້າງ ຢ່າງເດັດຂາດ. ພ້ອມນັ້ນ, ຕ້ອງປະຕິບັດມາດຕະການປ້ອງກັນຂັ້ນພື້ນຖານ ຄື: ການຮັກສາໄລຍະຫ່າງ, ໃສ່ຜ້າອັດປາກ-ດັງ, ໝັ່ນລ້າງມື ດ້ວຍນໍ້າສະອາດ ໃສ່ສະບູ ຫຼື ເຈວລ້າງມື.

2. ສຳລັບການຈັດປະຊຸມ ຄະນະຮັບຜີດຊອບ ຕ້ອງມີມາດຕະການຮອງຮັບ ເຊັ່ນ:
2.1 ທຸກຄົນທີ່ເຂົ້າມາຮ່ວມຕ້ອງ ສັກວັກຊີນຄົບ ລວມທັງເຂັມກະຕຸ້ນ ເມື່ອຮອດກຳນົດ;
2.2 ທຸກຄົນຕ້ອງມີຜົນກວດແບບໄວ (ATK) 24 ຊົ່ວໂມງກ່ອນປະຊຸມ ດ້ວຍຜົນລົບ ສໍາລັບກອປະຊຸມທີ່ມີຜູ້ເຂົ້າຮ່ວມຫຼາຍກວ່າ 100 ທ່ານ;
2.3 ຕິດຕັ້ງເຄື່ອງວັດແທກອຸນຫະພຸມ;
2.4 ໃສ່ຜ້າອັດປາກ-ດັງຕະຫຼອດ ໄລຍະປະຊຸມ;

2.5 ສະໜອງສະບູ ແລະ ເຈວລ້າງມື;
2.6 ຈັດບ່ອນນັ່ງໂດຍຮັກສາໄລຍະຫ່າງ ໃນໄລຍະປະຊຸມ, ພັກດື່ມກາເຟ ແລະ ພັກທ່ຽງ; ຖ້າກອງປະຊຸມສະໜອງອາຫານວ່າງ ຫຼື ອາຫານທ່ຽງ ແມ່ນໃຫ້ເຮັດເປັນກ່ອງ ຫຼື ຈັດສະຖານທີ່ ໂດຍຮັກສາໄລຍະຫ່າງ;

2.7 ຖ້າຜູ້ໃດມີອາການຄ້າຍຄືເປັນຫວັດ ແມ່ນບໍ່ໃຫ້ເຂົ້າຮ່ວມກອງປະຊຸມ.
3. ຄະນະສະເພາະກິດກະຊວງ, ອົງການ, ບັນດາແຂວງ ແລະ ນະຄອນຫຼວງວຽງຈັນ ສາມາດຕີລາຄາ ສະພາບການລະບາດຂອງພະຍາດ ແລ້ວພິຈາລະນາ ມາດຕະການກ່ຽວກັບການມາເຮັດວຽກຕາມສະພາບຄວາມເປັນຈິງຂອງແຕ່ລະບ່ອນ.

4. ໃຫ້ສືບຕໍ່ການຮຽນການສອນແບບເຊິ່ງໜ້າ ຂອງທຸກຊັ້ນ, ທຸກສາຍ ໃນສະຖານການສຶກສາ ໂດຍຮັບປະກັນການປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອ, ແຕ່ໃຫ້ໂຈະສະເພາະໂຮງຮຽນທີ່ບໍ່ສາມາດປະຕິບັດຕາມເງື່ອນໄຂ ແລະ ມາດຕະການທີ່ຄະນະສະເພາະກິດໄດ້ວາງອອກ ແລະ ໃຫ້ຄະນະສະເພາະກິດແຕ່ລະຂັ້ນ ຕິດຕາມ ແນະນຳບັນດາໂຮງຮຽນຢ່າງໃກ້ຊິດ. ພ້ອມກັນນີ້, ກໍປຸກລະດົມນັກຮຽນ-ນັກສຶກສາ ຕາມເກນອາຍຸ ທີ່ກະຊວງສາທາລະນະສຸກກຳນົດໄວ້ ໃຫ້ໄປຮັບວັກຊີນກັນໂຄວິດ-19 ຕາມແຜນການ.

5. ໃຫ້ຄະນະສະເພາະກິດທຸກພາກສ່ວນ ກວດກາຕົວເລກການສັກວັກຊິນຂອງພາກສ່ວນຕົນ ແລະ ມາດຕະການຊຸກຍູ້ໃນຂັ້ນຕໍ່ໄປ ເພື່ອຮັບປະກັນໃຫ້ທຸກຄົນ ໄດ້ເຂົ້າເຖິງການສັກວັກຊິນ ແນໃສ່ການສ້າງພູມຄຸ້ມກັນໃຫ້ບຸກຄົນ ແລະ ສັງຄົມ. ພ້ອມນີ້, ກໍ່ໃຫ້ສືບຕໍ່ການໂຄສະນາເຜີຍແຜ່ມາດຕະການປ້ອງກັນພະຍາດໂຄວິດ-19 ແລະ ປຸກລະດົມໃຫ້ທຸກຄົນມີຄວາມຕື່ນຕົວໃນການໄປຮັບວັກຊິນ.
6. ໃຫ້ຄະນະສະເພາະກິດທຸກພາກສ່ວນ ຊີ້ນຳການກວດກາບັດສັກວັກຊິນ ຫຼື QR Code Vaccine ID ຜ່ານແອບ LaoKYC ຂອງບຸກຄົນ ກ່ອນເຂົ້າສະຖານທີ່ເຮັດວຽກຂອງລັດ ແລະ ເອກະຊົນ ລວມທັງໂຮງຈັກໂຮງງານ.

7. ໃຫ້ຄະນະສະເພາະກິດ ກະຊວງອຸດສາຫະກຳ ແລະ ການຄ້າ ສົມທົບກັບຄະນະສະເພາະກິດຂັ້ນແຂວງ ແລະ ນະຄອນຫຼວງ ຊີ້ນຳການລົງຕິດຕາມ ກວດກາ ຮ້ານອາຫານ ແລະ ຮ້ານຄ້າຕ່າງໆ ໃຫ້ເຂັ້ມງວດໃນການກວດກາ ບັດສັກວັກຊິນ ຫຼື QR Code Vaccine ID ຜ່ານແອບ LaoKYC ກ່ອນການເຂົ້າໃຊ້ບໍລິການ, ຖ້າພົບເຫັນຜູ້ປະກອບການໃດມີການລະເມີດ ຕ້ອງດຳເນີນການຕັກເຕືອນ ແລະ ປັບໄໝຕາມລະບຽບການ.

8. ໃຫ້ຄະນະສະເພາະກິດກະຊວງໂຍທາທິການ ແລະ ຂົນສົ່ງ ຊີ້ນຳພາກສ່ວນກ່ຽວຂ້ອງຂອງຕົນເອົາໃຈໃສ່ລົງຕິດຕາມການຂົນສົ່ງ (ເຮືອບິນ, ເຮືອໂດຍສານ, ລົດໄຟ ແລະ ລົດໂດຍສານ) ໃຫ້ຜູ້ປະກອບການມີມາດຕະການປ້ອງກັນຜູ້ໂດຍສານ, ສະໜອງສະບູ ຫຼື ເຈວລ້າງມື ແລະ ມີຄວາມເຂັ້ມງວດໃນການກວດກາ ບັດສັກວັກຊິນ ຫຼື QR Code Vaccine ID ຜ່ານແອບ LaoKYC ກ່ອນການເຂົ້າໃຊ້ບໍລິການ, ຖ້າພົບເຫັນຜູ້ປະກອບການໃດລະເມີດ ຕ້ອງດຳເນີນການຕັກເຕືອນ ແລະ ປັບໄໝຕາມລະບຽບການ.

9. ໃຫ້ຄະນະສະເພາະກິດກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ ປະສານສົມທົບກັບຄະນະສະເພາະກິດຂັ້ນແຂວງ ແລະ ນະຄອນຫຼວງວຽງຈັນ ສືບຕໍ່ເພີ່ມທະວີການຕິດຕາມກວດກາ ການເຂົ້າ-ອອກ ຕາມດ່ານຊາຍແດນ ເພື່ອຮັບປະກັນບໍ່ໃຫ້ມີການເຂົ້າ-ອອກແບບຊະຊາຍ ຫຼື ມີການລັກລອບເຂົ້າ-ອອກ ບໍ່ຜ່ານດ່ານຊາຍແດນ.
ແຈ້ງການສະບັບນີ້ ມີຜົນສັກສິດ ນັບແຕ່ວັນທີ 31 ມີນາ 2022 ເປັນຕົ້ນໄປ, ພວກເຮົາ ຈະສືບຕໍ່ປະເມີນສະພາບການ, ທົບທວນ ແລະ ດັດປັບມາດຕະການ ໃຫ້ເໝາະສົມກັບສະພາບຕົວຈິງຕື່ມ, ກໍລະນີມີການປ່ຽນແປງ ລັດຖະບານ ຈະແຈ້ງໃຫ້ຊາບເປັນແຕ່ລະໄລຍະ.ບັນດາທ່ານ ທີ່ນັບຖື ແລະ ຮັກແພງ,

ໃນສະພາບເງື່ອນໄຂ ທີ່ການລະບາດຍັງສືບຕໍ່ແພ່ລາມໃນວົງກວ້າງ, ພວກເຮົາມີຄວາມຈໍາເປັນ ຕ້ອງສືບຕໍ່ຕັ້ງໜ້າໃນການປະຕິບັດໜ້າທີ່ວຽກງານ, ດຳເນີນທຸລະກິດ ແລະ ທໍາມາຫາກິນ ດ້ວຍຄວາມລະມັດລະວັງ, ມີຄວາມຮັບຜິດຊອບ ໃນການປະຕິບັດບັນດາມາດຕະການ ປ້ອງກັນຂັ້ນພື້ນຖານ ທີ່ຄະນະສະເພາະກິດໄດ້ວາງອອກ ເປັນຕົ້ນ: ໃສ່ຜ້າອັດປາກ-ດັງ, ໝັ່ນລ້າງມືດ້ວຍນໍ້າສະອາດ

ໃສ່ສະບູ ຫຼື ເຈວລ້າງມື, ຮັກສາໄລຍະຫ່າງ ສິ່ງສໍາຄັນແມ່ນການໄປຮັບວັກຊີນໃຫ້ຄົບໂດສ ລວມທັງ ເຂັມກະຕຸ້ນ. ຖ້າເຮັດໄດ້ແນວນັ້ນ ຈຶ່ງຈະສາມາດສ້າງພູມຄຸ້ມກັນໝູ່ຮອບດ້ານ ຕ້ານເຊື້ອພະຍາດໂຄວິດ-19, ປ້ອງກັນຕົນເອງ ແລະ ຄອບຄົວ, ໂດຍສະເພາະ ຜູ້ອາຍຸສູງ, ຜູ້ມີພະຍາດປະຈໍາຕົວ, ຕະຫຼອດຮອດຊຸມຊົນທີ່ຕົນເອງດຳລົງຊີວິດຢູ່.

ນອກຈາກນີ້, ຂໍໃຫ້ຕິດຕາມຂໍ້ມູນຂ່າວສານຈາກແຫຼ່ງຂ່າວທາງການ, ຕິດຕາມການຖະແຫຼງຂ່າວປະຈຳວັນຂອງຄະນະສະເພາະກິດ ຊຶ່ງນອກຈາກຈະແຈ້ງສະຖິຕິການຕິດເຊື້ອ ແລະ ການເສຍຊີວິດ ທັງພາຍໃນ ແລະ ຕ່າງປະທດແລ້ວ, ຍັງໃຫ້ມີຂໍ້ແນະນຳທາງດ້ານການແພດ, ນິຕິກຳ ແລະ ມາດຕະການຕ່າງໆ ທີ່ຂະແໜງການ ຫຼື ທ້ອງຖິ່ນວາງອອກ. ພ້ອມກັນນີ້, ຂໍທຸກຄົນໃຫ້ມີສະຕິໃນການບໍລິໂພກຂໍ້ມູນຂ່າວສານ ແລະ ບໍ່ໃຫ້ສົ່ງຕໍ່ຂໍ້ມູນທີ່ບໍ່ມີຄວາມຈິງ ຫຼື ບິດເບືອນຄວາມຈິງ.

ໃນໂອກາດນີ້, ອີກເທື່ອໜຶ່ງ ຂ້າພະເຈົ້າ ຂໍຮຽກຮ້ອງມາຍັງ ທຸກອົງການຂອງພັກ, ລັດ, ທຸກການຈັດຕັ້ງ ແລະ ທຸກຄົນໃນສັງຄົມ ຍົກສູງສະຕິຄວາມຮັບຜິດຊອບ ແລະ ເປັນເຈົ້າການຮ່ວມກັນ ໃນການປະຕິບັດມາດຕະການ ທີ່ລັດຖະບານ ກໍຄືຄະນະສະເພາະກິດ ວາງອອກ ຢ່າງເປັນເອກະພາບ ແລະ ເຂັ້ມງວດ.

ສຸດທ້າຍນີ້, ເນື່ອງໃນໂອກາດປີໃໝ່ລາວປີຂານ ພສ 2565 ທີ່ຈະມາເຖິງນີ້, ຂ້າພະເຈົ້າ ຂໍອວຍພອນໃຫ້ທຸກໆທ່ານຈົ່ງມີສຸຂະພາບແຂງແຮງ, ມີຜົນສໍາເລັດ ໃນໜ້າທີ່ວຽກງານຂອງຕົນ ແລະ ປອດໄພ ຈາກເຊື້ອພະຍາດທຸກຊະນິດ.

Related Articles

Leave a Reply

Your email address will not be published.

Back to top button