ຂ່າວທົວໄປ

ລົດໄຟ ລາວ-ຈີນ ທັງເບື້ອງລາວ ແລະ ເບື້ອງ ສປ ຈີນ​ ເປີດນຳໃຊ້ແລ້ວ ລວມຄວາມຍາວຂອງເສັ້ນທາງທັງໝົດ 1.035 ກິໂລແມັດ.

ລົດໄຟ ລາວ-ຈີນ ທັງເບື້ອງລາວ ແລະ ເບື້ອງ ສປ ຈີນ​ ເປີດນຳໃຊ້ແລ້ວ ລວມຄວາມຍາວຂອງເສັ້ນທາງທັງໝົດ 1.035 ກິໂລແມັດ.

ໃນວັນທີ 3 ທັນວາ 2021 ນີ້, ເສັ້ນທາງລົດໄຟຈີນ-ລາວ ທີ່ເຊື່ອມຕໍ່ ນະຄອນຄຸນມິງ, ແຂວງຢູນນານ, ສປ ຈີນ ຫາ ນະຄອນຫລວງວຽງຈັນ ສປປ ລາວ ໄດ້ເປີດນຳໃຊ້ ແລະ ໃຫ້ບໍລິການຢ່າງເປັນທາງການແລ້ວ.

ກຸ່ມລັດວິສາຫະກິດທາງລົດໄຟແຫ່ງຊາດຈີນ ໄດ້ໃຫ້ຮູ້ວ່າ: ທາງລົດໄຟຈີນ-ລາວ ມີຄວາມຍາວທັງໝົດ 1.035 ກິໂລແມັດ, ເປັນທາງ ລົດໄຟສາກົນທີ່ເຊື່ອມຕໍ່ກັບຕາໜ່າງລົດໄຟຈີນໂດຍກົງ, ທາງເໜືອ ເລີ່ມຈາກ ນະຄອນຄຸນມິງ ແຂວງຢູນນານ ທາງພາກຕາເວັນຕົກສຽງໃຕ້ຂອງປະເທດຈີນ, ທາງໃຕ້ເນັ່ງຜ່ານນະຄອນຢູ້ຍຊີ່, ນະຄອນພູເອີ, ກິ່ງ ແຂວງສິບສອງພັ່ນພາ, ຜ່ານ ດ່ານທາງລົດໄຟບໍ່ຫານ ປະເທດຈີນ ແລະ ດ່ານທາງລົດໄຟບໍ່ເຕັນ ປະເທດປະເທດລາວ ເຂົ້າສູ່ເຂດພາກເໜືອລາວ ແລ້ວສືບຕໍ່ເນັ່ງຜ່ານແຂວງຫລວງນ້ຳທາ, ແຂວງອຸດົມໄຊ, ແຂວງຫລວງພະບາງ, ແຂວງວຽງຈັນ ໄປຈົນຮອດນະຄອນຫລວງວຽງຈັນ ປະເທດລາວ.

ພາຍຫລັງທາງລົດໄຟຈີນ-ລາວ ເປີດນຳໃຊ້ ແລະ ໃຫ້ບໍລິການແລ້ວ, ການເດີນທາງຈາກ ຄຸນມິງ ຫາ ບໍ່ຫານ ໄວສຸດຈະໃຊ້ເວລາ 5:20 ຊົ່ວໂມງ, ຈາກ ບໍ່ເຕັນ ຫາ ນະຄອນຫລວງວຽງຈັນ ໄວສຸດຈະໃຊ້ເວລາ 3:20 ຊົ່ວໂມງ. ບວກກັບເວລາຜ່ານດ່ານ, ຜູ້ໂດຍສານທີ່ເດີນທາງຈາກຄຸນມິງ ຫາ ນະຄອນຫລວງວຽງຈັນ ໄວສຸດຈະໃຊ້ເວລາປະມານ 10 ຊົ່ວໂມງ ກໍ່ໄປຮອດແລ້ວ.

ການເປີດນຳໃຊ້ ແລະ ໃຫ້ບໍລິການທາງລົດໄຟ ຈີນ-ລາວ ຈະອຳນວຍ ຄວາມສະດວກໃຫ້ແກ່ການເດີນທາງຂອງປະຊາຊົນຢ່າງຫລວງຫລາຍ, ຊຸກຍູ້ການພັດທະນາໃນດ້ານຕ່າງໆຢູ່ລຽບຕາມເສັ້ນທາງລົດໄຟເຊັ່ນ: ການທ່ອງທ່ຽວ, ກະສິກຳ, ຊັບພະຍາກອນນ້ຳ ແລະ ການກໍ່ສ້າງຕົວເມືອງ, ປະກອບສ່ວນເຂົ້າໃນການພັດທະນາເຂດນິຄົມເສດຖະກິດຕ່າງໆເປັນຕົ້ນເຂດ ພັດທະນາກວມລວມໄຊເສດຖານະຄອນຫລວງວຽງຈັນ, ເຂດຮ່ວມມືເສດຖະກິດບໍ່ຫານ-ບໍ່ເຕັນ ລະຫວ່າງ ຈີນ-ລາວ ແລະ ອື່ນໆ.

ທັງມີຄວາມໝາຍສຳຄັນຍິ່ງຕໍ່ກັບການຮັດແໜ້ນການຮ່ວມມືດ້ານເສດຖະກິດສັງຄົມ, ການແລກປ່ຽນ ແລະ ການຮ່ວມມືດ້ານວັດທະນະທຳລະຫວ່າງສອງປະເທດ, ການເລັ່ງສ້າງແລວເສດຖະກິດຈີນ-ລາວ ໃຫ້ໄວຂຶ້ນກໍຄືການສ້າງຄູ່ຮ່ວມຊາຕາກຳຈີນ-ລາວ. ໃນຖານະເປັນສາຍທາງຫລັກທີ່ສຳຄັນຂອງທາງລົດໄຟອາຊີ, ທາງລົດໄຟຈີນ-ລາວ ຍັງຈະກາຍເປັນ “ກະແຈຄຳ” ຂອງ ປະເທດລາວທີ່ທິດເໜືອເຊື່ອມຕໍ່ກັບປະເທດຈີນ, ທິດຕາເວັນຕົກເຊື່ອມຕໍ່ກັບປະເທດໄທ, ມາເລເຊຍ ແລະ ປະເທດອື່ນໆໃນອາຊຽນ ເຊິ່ງຈະສົ່ງຜົນດີໃຫ້ກັບການຮ່ວມມືດ້ານເສດຖະກິດໃນເຂດການຄ້າເສລີຈີນ-ອາຊຽນ ແລະ ອະນຸພາກພື້ນແມ່ນ້ຳຂອງ.

ຂໍ້ມູນຈາກ: CRI-FM93

Related Articles

Leave a Reply

Your email address will not be published. Required fields are marked *

Back to top button