ຂ່າວທົວໄປ

ສະມາຊີກສະພາ ຫລາຍເຂດ ໄດ້ມີການສະເໜີເຖິງລັດຖະບານ ຂໍໃຫ້ດໍາເນີນມາດຕະການຂັ້ນເດັດຂາດ ກັບຜູ້ສໍ້ລາດບັງຫລວງ.

Sponsor by sokxay plus

ວີທີຊື້ເລກ ໄດ້ຮັບເງີນຄືນ 5% ໄດ້ແທ້ 100%

ພຽງເທົ່ານີ້ ກໍ່ຮັບໄປເລີຍ ສ່ວນຫຼຸດ 5% ງ່າຍ



ພາຍຫລັງເຫັນວ່າການສໍ້ລາດບັງຫລວງ ທີ່ແມ່ນສາເຫດຕົ້ນຕໍ ເຮັດໃຫ້ພະນັກງານເສື່ອມເສຍຄຸນທາດການເມືອງ, ພາໃຫ້ອົງການຈັດຕັ້ງຂອງ ພັກ-ລັດ ອ່ອນແອ ແລະ ເປັນໄພອັນຕະລາຍຮ້າຍແຮງ, ທັງກະທົບຕໍ່ລະບົບເສດຖະກິດລວມຂອງປະເທດ.

ການສະເໜີຕໍ່ບັນຫາດັ່ງກ່າວ, ມີຂຶ້ນໃນວາລະປະກອບຄໍາເຫັນຕໍ່ບົດລາຍງານ ຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ໃນກອງປະຊຸມສະໄໝສາມັນເທື່ອທີ 02 ຂອງສະພາແຫ່ງ ຊາດຊຸດທີ IX ໃນວັນທີ 06 ພະຈິກ 2021.

(1). ທ່ານນາງ ອໍາໄພວອນ ລ້ອມບຸນແພງ ສສຊ ເຂດ 08 ແຂວງຫົວພັນ ມີຄໍາເຫັນວ່າ:

1. ຜ່ານການຮັບຟັງບົດລາຍງານວຽກງານກວດກາ ເຫັນວ່າມີທັງດ້ານດີ ແລະ ຕັ້ງໜ້າ ແລະ ຈຸດອ່ອນ ແລະ ຂໍ້ຄົງຄ້າງ, ບາງເປົ້າໝາຍກໍໄດ້ກວດກາ, ກວດຖືກ ແລະ ສາມາດແກ້ໄຂຢ່າງທັນການ, ແຕ່ກໍຍັງມີຫລາຍເປົ້າໝາຍເຫັນວ່າມີຄວາມຫລ້າຊ້າ ແລະ ພົບອຸປະສັກຫຍຸ້ງຍາກຫລາຍດ້ານ,

2. ແຕ່ບັນຫາທີ່ມີຄວາມເປັນຫ່ວງ ແມ່ນຜົນເສຍຫາຍຈາກການສໍ້ລາດບັງຫລວງທີ່ມີຈໍານວນຫລວງຫລາຍໃນແຕ່ລະປີນັ້ນ ກໍຍັງບໍ່ທັນສາມາດເກັບກູ້ຄືນມາໃຫ້ລັດໄດ້ຫລາຍເທົ່າທີ່ຄວນ,

3. ບັນຫາເຫລົ່ານີ້ມັນໄດ້ຊີ້ໃຫ້ເຫັນວ່າການກວດກາຢູ່ຫລາຍເປົ້າໝາຍ ບໍ່ທັນມີຄວາມເອກະພາບ, ບໍ່ທົ່ວເຖິງທຸກເປົ້າໝາຍ ແລະ ບໍ່ເຂັ້ມງວດ,4. ຫລາຍເປົ້າໝາຍເກີດມີລັກສະນະໂຍະຍານ, ມີສະພາບອ່ອນແລ້ວແທງ-ແຂງແລ້ວເວັ້ນ ແລະ ເຮັດໃຫ້ຜູ້ກະທໍາຜິດຈໍານວນໜຶ່ງບໍ່ຖືກວິໄນຢ່າງເໝາະສົມຕາມລະບຽບກົດໝາຍ;

(2). ທ່ານ ແດງ ປະທຸມທອງ ສສຊ ເຂດເລືອກຕັ້ງທີ 18 ແຂວງໄຊສົມບູນ ມີຄໍາເຫັນວ່າ: ຕໍ່ວຽກງານ ກວດກາ-ກວດສອບນີ້ ເມື່ອພົບເຫັນການລະເມີດ ຫລື ກະທໍາຜິດແລ້ວ ຂໍໃຫ້ລັດຖະບານ ເພີ່ມທະວີຄວາມເດັດຂາດເຂັ້ມງວດ ໃນການລົງໂທດຕາມຕົວບົດກົດໝາຍ ໂດຍສະເພາະເຫດເກີດຢູ່ບ່ອນໃດຕ້ອງ ຮີບຮ້ອນແກ້ຢູ່ບ່ອນນັ້ນ ຖ້າຫາກບ່ອນໃດບໍ່ຢາກແກ້ ຫລື ແກ້ບັນຫາບໍ່ໄດ້ ຕ້ອງແກ້ໄຂຜູ້ເປັນຫົວໜ້າຢູ່ບ່ອນນັ້ນ;

(3). ທ່ານ ມີນາພອນ ໄຊຊົມພູ ສສຊ ເຂດເລືອກຕັ້ງທີ 17 ແຂວງອັດຕະປື ມີຄໍາເຫັນວ່າ:

1. ວຽກງານກວດກາເປັນວຽກທີ່ທ້າທາຍ ແລະ ຫຍຸ້ງຍາກ ເຊິ່ງສະແດງອອກໃນຜົນການກວດກາ-ກວດສອບ ໃນໄລຍະຜ່ານ, ທີ່ມີລັກສະນະຄຸມເຄືອແກ່ຍາວ, ອີກດ້ານໜຶ່ງວຽກກວດກາແມ່ນວຽກທີ່ສັງຄົມໃຫ້ຄວາມສົນໃຈຫລາຍ ແລະ ຕັ້ງໂຈດວ່າການກວດກາຈະມີຄວາມເດັດຂາດເຂັ້ມງວດຫລາຍສ່ຳໃດ,

(4). ທ່ານ ບຸນທາມ ພຸດທະວົງສາ ສສຊ ເຂດເລືອກຕັ້ງທີ 01 ນະຄອນຫລວງວຽງຈັນ ມີຄໍາເຫັນວ່າ:

1. ເພື່ອເຮັດໃຫ້ວຽກ ງານກວດກາ-ກວດສອບ ສາມາດດໍາເນີນໄປໄດ້ຢ່າງເຂັ້ມແຂງ ແລະ ມີປະສິດທິຜົນນັ້ນ ເວລາຈັດຕັ້ງປະຕິບັດຕົວຈິງ ເມື່ອຮູ້ຜົນຂອງການກວດກາແລ້ວ ຄວນນໍາເອົາຜົນດັ່ງກ່າວເຂົ້າສູ່ຂະບວນການດໍາເນີນຄະດີຕາມລະບຽບກົດໝາຍທັນທີ, ນັບທັງທາງແພ່ງ, ອາຍາ ແລະ ບໍລິຫານ,

2. ອັນນີ້ມັນຈະສ້າງຄວາມເຊື່ອໝັ້ນຂອງສັງຄົມ ຕໍ່ບົດບາດການນໍາພາຂອງພັກ ແລະ ລັດເຮົາ ເຊິ່ງວິທີການດັ່ງກ່າວນີ້ ຫລາຍໆປະເທດໃນໂລກກໍໄດ້ປະຕິບັດຢ່າງມີປະສິດທິຜົນ,

3. ຈາກສະພາບຜ່ານມານີ້ ພວກເຮົາໄດ້ກວດພົບເຫັນແລ້ວ ແຕ່ການດໍາເນີນຄະດີພັດບໍ່ເຂັ້ມງວດ, ກວດໄປແລ້ວພົບຜູ້ມີອໍານາດກ່ຽວຂ້ອງພັດເວັ້ນໜີ, ດັ່ງນັ້ນ ຂໍໃຫ້ລັດຖະບານກ້າຕັດສີນໃຈແກ້ໄຂຜົນການກວດສອບຢ່າງເດັດຂາດ ບໍ່ສະນັ້ນປະເທດຊາດກໍຈະສືບຕໍ່ສູນເສຍງົບປະມານ, ຜູ້ກະທໍາຜິດສືບຕໍ່ລອຍນວນ ຈົນເກີດມີຫາງສຽງຈາກສັງຄົມ

(ຂໍ້ມູນ ສຳນັກຂ່າວສານແຫ່ງ ປະເທດລາວ).

ຂອບໃຈທີ່ມາ:Sourioudong Sundara

Related Articles

Leave a Reply

Your email address will not be published.

Back to top button