ຂ່າວທົວໄປ

ລາວ ມີແຜນຈົດທະບຽນຜະລິດຕະພັນພືດ 3 ຊະນິດ

ລາວ ມີແຜນຈົດທະບຽນຜະລິດຕະພັນພືດ 3 ຊະນິດທີ່ສາມາດປິ່ນປົວໂຄວິດ ມີປະສິດທິຜົນສູງ

ຕາມການລາຍງານຂອງ ຂ່າວສານປະເທດລາວ ໄດ້ລາຍງານວ່າ: ນັບວ່າເປັນຂ່າວດີ ສໍາລັບວົງການການແພດລາວເຮົາ ໃນການຢັບຢັ້ງການລະບາດຂອງພະຍາດໂຄວິດ-19, ຫລັງຈາກກະຊວງສາທາລະນະສຸກ ໄດ້ເຜີຍວ່າມີແຜນຈົດ ທະບຽນທັນທີຜະລິດຕະພັນພືດ 3 ຊະນິດ ຄື: ລາຊາບີ, ຜັກຄາວ ທອງ ແລະ ກະຊາຍຂາວ ທີ່ໃຫ້ຜົນທາງການທົດລອງດ້ານວິທະຍາສາດ ແລະ ນໍາໃຊ້ປິ່ນປົວຜູ້ຕິດເຊື້ອໂຄວິດຕົວຈິງ ເຫັນວ່າມີປະສິດທິພາບສູງ ໃນການປິ່ນປົວໂຄວິດ-19 ຫາຍດີ 80-100%.

ບັນຫານີ້, ເປີດເຜີຍໂດຍທ່ານ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ຕໍ່ກອງປະ ຊຸມສະໄໝສາມັນເທື່ອທີ 2 ຂອງສະພາ ແຫ່ງຊາດຊຸດທີ IX ໃນວັນທີ 4 ພະຈິກ 2021, ພາຍຫລັງມີສະມາ ຊິກສະພາແຫ່ງຊາດ (ສສຊ) ຫລາຍເຂດເລືອກຕັ້ງ ໄດ້ໃຫ້ຄວາມສົນ ໃຈກ່ຽວກັບ ຄວາມຄືບໜ້າຂອງການຄົ້ນຄວ້າ, ການນໍາໃຊ້ ຢາພື້ນເມືອງເຂົ້າ ໃນການປິ່ນປົວພະຍາດດັ່ງກ່າວ ໂດຍກະ ຊວງສາທາລະນະສຸກ ໄດ້ສົ່ງເສີມການຄົ້ນຄວ້າຢາພື້ນເມືອງ 3 ຊະນິດນີ້ ເພື່ອສົມທົບກັບຢາຫລວງ ໃນການປ້ອງກັນ ແລະ ປິ່ນປົວຜູ້ຕິດເຊື້ອໂຄວິດ-19.

ສະຖາບັນການແພດ- ການຢາພື້ນເມືອງ ໄດ້ຮັບມອບໝາຍໃນການຄົ້ນຄວ້າໃນ ຫ້ອງທົດລອງກວດຫາສານເຄມີສໍາຄັນຂອງພືດແຕ່ລະຊະນິດ ແລະ ຜ່ານການທົດລອງສາມາດພົບສານເຄມີສໍາຄັນຕົ້ນຕໍ ຄື: ມີສານ Andrographolide ຢູ່ໃນລາຊາບີ, ມີສານ Hyperoside ແລະ Quercetrin ຢູ່ໃນຜັກຄາວທອງ ແລະ ມີສານ Pinostrobin ແລະ Panduratin A ຢູ່ໃນກະຊາຍຂາວ.

ພ້ອມທັງໄດ້ເຮັດທົດລອງຜະລິດຕະພັນ 3 ຊະນິດໃສ່ສັດ ເພື່ອກວດກາປະສິດທິພາບ ແລະ ຄວາມປອດໄພ.

ທ່ານລັດຖະມົນຕີສາທາລະນະສຸກ ອະທິບາຍວ່າ: ຄຸນ ປະໂຫຍດຂອງພືດ 3 ຊະນິດນີ້, ແມ່ນຊ່ວຍເສີມສ້າງພູມຄຸ້ມກັນຂອງຮ່າງກາຍ ແລະ ຊ່ວຍຫລຸດຜ່ອນອາການໄອ, ໄຂ້ຫວັດໃຫຍ່, ແກ້ໄອ, ເຈັບຄໍ, ເຈັບອາມິດານ ແລະ ຊ່ວຍກະຕຸ້ນເຮັດໃຫ້ກິນເຂົ້າແຊບ.

ສໍາລັບການນໍາໃຊ້ປິ່ນປົວ ແມ່ນໄດ້ເອົາຜະລິດຕະພັນ 3 ຊະນິດ ໄປນໍາໃຊ້ກັບຜູ້ຕິດເຊື້ອໂຄວິດ-19 ຢູ່ແຂວງສະຫວັນນະເຂດ, ສາລະວັນ ແລະ ຈໍາປາສັກ ໃນສູນກັກບໍລິເວນຈໍານວນ 425 ກໍລະນີ.

ຜົນການປິ່ນປົວໃນກໍລະນີເບົາບາງ ແລະ ປານກາງ ແມ່ນມີອາ ການດີຂຶ້ນ 86-100% ສໍາລັບ ລາຊາບີ ແລະ ຜັກຄາວທອງ ແລະ ກະຊາຍຂາວ ມີປະສິດທິພາບເຖິງ 93-100%.

ສ່ວນກໍລະນີທົດລອງນະຄອນຫລວງວຽງຈັນໃນຈໍານວນ 450 ກໍລະນີ ພວມຢູ່ ໃນຂັ້ນຕອນເກັບກໍາຂໍ້ມູນຕື່ມອີກ.

ແນວໃດກໍຕາມ, ຜ່ານການລາຍງານຂອງພະແນກສາທາ ລະນະສຸກນະຄອນຫລວງ ແລະ ບັນດາແຂວງ ຕ່າງກໍຢັ້ງ ຢືນເປັນເອກພາບກັນວ່າ ຜະລິດຕະພັນພືດ 3 ຊະນິດ ແມ່ນມີຄຸນນະພາບ, ມີຄວາມປອດໄພ ແລະ ມີປະສິດທິຜົນໃນການປິ່ນປົວ. ສ່ວນຂໍ້ມູນທີ່ຊັດເຈນ ແມ່ນກໍາລັງດໍາເນີນການວິເຄາະຂໍ້ມູນຕາມ ຫລັກວິຊາການຂອງສະຖາບັນສາ ທາລະນະສາດ ແລະ ພະຍາດເຂດຮ້ອນ, ຖ້າຜົນການສຶກ ສາ ສາມາດຮັບປະກັນໄດ້ດ້ານຄຸນນະພາບ, ຄວາມປອດໄພ ແລະ ມີປະສິດທິຜົນດີ ກໍຈະຈົດທະບຽນຜະລິດຕະພັນທັນທີ, ພ້ອມທັງສົມທົບກັບພາກສ່ວນກ່ຽວຂ້ອງເລັ່ງສະ ໜັບສະໜູນໃຫ້ແກ່ການປູກ ແລະ ການຜະລິດ ເພື່ອຕອບສະໜອງຄວາມຮຽກຮ້ອງຕ້ອງການໃນສະພາບການ ສຸກ ເສີນໃນປັດຈຸບັນ.

Related Articles

Leave a Reply

Your email address will not be published.

Back to top button