ຂ່າວທົວໄປ

ບໍລິສັດ ພຣູເດັນໂຊລ໌ ປະກັນໄພຊີວິດ

ບໍລິສັດ ພຣູເດັນໂຊລ໌ ປະກັນຊີວິດ (ລາວ) ຈຳກັດ ໄດ້ໃຫ້ເງິນຊ່ວຍ ເຫລືອລ້າ ຫລື Covid Care Fund ແກ່ຜູ້ຕິດເຊື້ອໂຄວິດ-19 ຢູ່ ສປປ ລາວ ກໍຄື ພະນັກງານ, ຄອບຄົວ, ອາສາສະໝັກ ອົງການກາແດງລາວ ແລະ ປະຊາຊົນລາວ ບັນດາເຜົ່າ ໃນຂອບເຂດທົ່ວປະເທດ ຈຳນວນ 10.000 ຄົນ ແລະ ໄດ້ມີພິທີເຊັນສັນ ຍາໃຫ້ທຶນຊ່ວຍເຫລືອດັ່ງກ່າວ ໃນວັນທີ 2 ພະຈິກ 2021

ລະຫວ່າງ ທ່ານ ສິງ ເມໂນລາດ ຮອງປະທານອົງການກາແດງລາວ ແລະ ທ່ານ ວິເຈ ມັດດາວັນ ຜູ້ອຳນວຍການໃຫຍ່ ບໍລິສັດພຣູເດັນໂຊລ໌ ປະກັນໄພຊີວິດລາວ ຈຳກັດ ໂດຍມີ ທ່ານ ພູທອນ ເມືອງປາກ ປະທານອົງການກາແດງລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ ເປັນສັກຂີພິຍານ.

ການຊ່ວຍເຫລືອດັ່ງກ່າວ, ຈະແຍກອອກເປັນ 2 ໄລຍະ ຄື: ໄລຍະທີ 1 ເລີ່ມແຕ່ ວັນທີ 1 ພະຈິກ ຫາ 31 ທັນວາ 2021 ແລະ ໄລຍະທີ 2 ນັບແຕ່ວັນທີ 1 ມັງກອນ ຫາ 31 ມີນາ 2022, ເຊິ່ງຜູ້ທີ່ຈະໄດ້ຮັບທຶນຊ່ວຍເຫລືອດັ່ງກ່າວ, ຕ້ອງໄດ້ລົງທະບຽນ ແລະ ໄດ້ຮັບການກວດພົບເຊື້ອໂຄວິດ-19 ໃນໄລຍະການຊ່ວຍເຫລືອ,

ຈະມີສິດໄດ້ຮັບເງິນຊ່ວຍເຫລືອລ້າ 5 ລ້ານກີບ, ໃນກໍລະນີຜູ້ລົງທະບຽນໄດ້ເສຍຊີວິດຍ້ອນ ໂຄວິດ-19 ໃນໄລຍະເວລາຂອງການຊ່ວຍເຫລືອ ຈະມີສິດໄດ້ຮັບເງິນຊ່ວຍເຫລືອລ້າ 20 ລ້ານກີບ, ຖ້າທ່ານໃດຢາກລົງທະບຽນຂໍທຶນຊ່ວຍເຫລືອດັ່ງກ່າວ, ສາມາດຕິດຕໍ່ພົວພັນໄດ້ນຳອົງການກາແດງລາວ ແລະ ອົງການກາແດງຂອງບັນດາແຂວງ ໃນຂອບເຂດທົ່ວປະເທດ.

ການສະເໜີຂໍເງິນຊ່ວຍເຫລືອລ້າ ຕ້ອງປະກອບເອກະສານ ດັ່ງນີ້: ສໍາເນົາບັດປະຈໍາຕົວຫລື ໜັງສືເດີນທາງ, ປຶ້ມສໍາມະໂນຄົວຂອງຜູ້ລົງທະບຽນ ແລະ ເດັກນ້ອຍທີ່ຢູ່ຮ່ວມກັນ (ຖ້າມີ); ການຢັ້ງຢືນຊື່, ເບີໂທລະສັບມືຖື ແລະ ທີ່ຢູ່ອີເມວ ຕາມການລົງທະ ບຽນ; ໃບຢັ້ງຢືນການແພດ ຫລື ໃບຢັ້ງຢືນກວດວິເຄາະໂຄວິດ-19, ເອກະສານດັ່ງກ່າວ ຕ້ອງໄດ້ຮັບການຢັ້ງຢືນຈາກໂຮງໝໍຂອງລັດຖະບານ ທີ່ຂຶ້ນກັບກະຊວງສາທາລະນະສຸກ;

ໃນກໍລະນີຂໍທຶນຊ່ວຍເລືອລ້າຈາກການເສຍຊີວິດ, ຕ້ອງມີໃບຢັ້ງຢືນການເສຍຊີວິດ ຍ້ອນສາເຫດຈາກໂຄວິດ-19 ຈາກໂຮງໝໍ; ຂໍ້ມູນບັນຊີທະນາຄານຂອງຜູ້ລົງທະບຽນ ຫລື ສະມາຊິກໃນຄອບຄົວ ສໍາລັບການຈ່າຍທຶນຊ່ວຍເຫລືອລ້າ, ເຊິ່ງທຶນຊ່ວຍເຫລືອລ້າຈະຈ່າຍຜ່ານບັນຊີຂອງຜູ້ລົງທະບຽນ ຫລື ສະມາຊິກໃນຄອບຄົວ ຫລື ນາຍບ້ານ ພາຍໃນ 10 ວັນ ໃນວັນລັດຖະການ.

ໂອກາດດຽວກັນນີ້, ທ່ານ ວິເຈ ມັດດາວັນ ຜູ້ອຳນວຍການໃຫຍ່ບໍລິສັດ ພຣູເດັນໂຊລ໌ ປະກັນຊີວິດ (ລາວ) ຈຳກັດ ກໍໄດ້ໃຫ້ທຶນຊ່ວຍເຫລືອລ້າ ຈຳນວນ 440 ກວ່າລ້ານກີບ ໃຫ້ອົງການກາແດງລາວ ນຳໃຊ້ເຂົ້າໃນວຽກງານຕ້ານ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19 ຢູ່ ສປປ ລາວ ກ່າວຮັບໂດຍ ທ່ານ ພູທອນ ເມືອງປາກ ປະທານອົງການກາແດງລາວ ຕື່ມອີກ.

ຂ່າວ: ທະນູທອງ.

ພາບ: ເນັດ ກາແດງລາວ

Related Articles

Leave a Reply

Your email address will not be published. Required fields are marked *

Back to top button